O novo centro de saúde de Moaña atendeu un total de 17.580 actos asistenciais durante o seu primeiro mes de funcionamento. Esta cifra inclúe tanto a actividade programada de consultas como a atención de urxencias en horario de tarde durante a semana.
Dentro da actividade asistencial ordinaria, realizáronse 17.158 consultas. Destacan as 8.432 de medicina de familia, 5.598 de enfermería, 912 de fisioterapia, 866 de pediatría e 314 coa matrona. Sumáronse tamén consultas de odontoloxía (295), hixiene bucodental (256), nutrición (87), traballo social (196), farmacia (33) e función administrativa (169).
En canto á atención urxente en quenda de tarde, para a que se dispón de médico e enfermeira, o centro rexistrou 422 asistencias desde a súa posta en marcha o pasado 15 de xuño.
A ambulancia de soporte vital avanzado con base en Moaña efectuou 98 mobilizacións no mesmo período, ampliando o seu horario a 24 horas os 7 días da semana. Na franxa de 00:00 a 08:59 horas houbo 13 asistencias, e entre as 21:00 e as 00:00 horas, 10 mobilizacións.
Do total de asistencias da ambulancia, 55 foron para pacientes do propio municipio, mentres que o resto se distribuíron principalmente entre Cangas e outras localidades da contorna. Os motivos máis frecuentes foron alteracións do nivel de consciencia (17), cadros de dor (14) e accidentes de tráfico (11).
A posta en funcionamento deste centro supuxo un investimento de 9,6 millóns de euros, o maior realizado pola Xunta no municipio para construción e equipamento. As novas instalacións, con 3.000 metros cadrados, triplican a superficie anterior e concentran unha ampla carteira de servizos.
O centro conta con oito consultas de medicina xeral e oito de enfermería, dúas de pediatría e dúas de enfermería pediátrica, ademais de área da muller e para o persoal. Tamén dispón de servizo de saúde bucodental, fisioterapia cunha consulta e sala de rehabilitación, e consulta de psicoloxía de atención primaria.
Garante atención urxente os sete días da semana, as 24 horas, con facultativo e enfermeira polas tardes e ata as dez da noite, ademais do horario ampliado da ambulancia de soporte vital avanzado.
