O presidente da Deputación de Pontevedra, Luis López, participou en Bueu na presentación dunha nova edición do festival SonRías Baixas. O evento, que se celebrará no recinto das Lagoas, congregará a milleiros de persoas chegadas de distintos puntos de Galicia, España e do estranxeiro.
O mandatario provincial puxo en valor o impacto e a traxectoria deste festival, que conta co patrocinio da Deputación a través da marca Rías Baixas Fest. López subliñou a súa capacidade para dinamizar a actividade económica na comarca e na provincia, así como para descentralizar os grandes eventos culturais.
O festival SonRías Baixas celebra este ano a súa vixésimo terceira edición, que se estenderá do 30 de xullo ao 1 de agosto. Durante tres días, ofrecerá unha oferta cultural variada nunha contorna que combina servizos urbanos de calidade cun patrimonio natural único. O cartel mestura artistas de prestixio nacional con músicos locais, atraendo cada ano a preto de 30.000 asistentes.
“"Falar das Rías Baixas e deste destino extraordinario é falar do SonRías. Na provincia non se pode entender o verán sen este festival tan consolidado e de tanta calidade."
Luis López salientou a pegada deste festival na economía e na proxección turística da provincia, afirmando que "o SonRías Baixas son algo máis que tres días de concertos. É fonte de riqueza, emprego e crecemento económico importante para Bueu e a provincia". Engadiu que os estudos indican que a pegada do festival supera os 7 millóns de euros.
O presidente tamén destacou que o festival descentraliza os eventos culturais, levándoos a todos os recunchos da provincia, e serve para proxectar as Rías Baixas por todo o mundo, consolidando o destino como líder.
López lembrou o apoio da Deputación a este e outros festivais baixo a marca Rías Baixas Fest, que este ano reciben un maior respaldo co obxectivo de seguir consolidándoos como referencia cultural e musical. Tras agradecer o labor dos organizadores, invitou a achegarse a Bueu para desfrutar do patrimonio cultural e natural da provincia.
