O orzamento municipal de Marín para o ano 2026 acadará os 18.528.406,75 euros. Esta cifra representa un aumento significativo no gasto principal, motivado pola actualización do contrato de recollida de Residuos Sólidos Urbanos, cuxo custo case se duplica en relación co anterior, o que implica unha mellora substancial na xestión deste servizo no municipio.
O novo contrato de xestión de lixo, aprobado en novembro de 2025 por un valor de 17 millóns de euros e adxudicado en dous lotes a Urbaser e Arroupa para os próximos dez anos, é o principal factor deste incremento. Este aumento no gasto de residuos supón un crecemento global do 3,68% respecto ao orzamento de 2025, sendo un documento que, segundo fontes da alcaldía, está "axustado á realidade económica do Concello".
A aprobación inicial destas contas municipais levarase ao pleno da Corporación o vindeiro xoves, 18 de xuño. Tras este paso, necesario para a súa aprobación definitiva, abrirase un prazo para a presentación de alegacións por parte da cidadanía.
O resto das partidas orzamentarias mantéñense cunha distribución porcentual similar á do documento de 2025. Desde o Goberno local explican que se teñen en conta "os esforzos de xestión para facer fronte a todos os gastos da actividade regular e diaria", ademais da "importancia de acadar financiación externa, a través de convenios e subvencións con outras administracións, para facer fronte a inversións de maior calado".
Entre os convenios e fondos externos conseguidos polo Concello de Marín, que complementan o Capítulo 6 do orzamento, destacan os Plans Extraordinarios e os Plans Máis Provincia da Deputación de Pontevedra, así como os 6,5 millóns de euros da EDIL (Estrategia de Desenvolvemento Integrado Local) procedentes do Fondo Europeo de Desenvolvemento Rexional da UE.
O desglose por áreas revela que á limpeza de espazos públicos, xestión de residuos, abastecemento, saneamento e alumeado público destínanse 5.486.746,65 euros (29,61%). Os servizos sociais e emprego contan con 2.322.769,35 euros (12,54%), mentres que educación e deporte recibirán 2.005.528,87 euros (10,82%).
A seguridade cidadá (Policía Local e Protección Civil) e mobilidade urbana disporán de 1.831.650,78 euros (9,89%); urbanismo e vías públicas terán 1.870.722,34 euros (6,37%); a mellora medioambiental e o mantemento de parques, xardíns e cemiterios contarán con 902.025,59 euros (4,87%); cultura e festas recibirán 1.268.074,11 euros (6,94%); e turismo e comercio terán asignados 291.233,23 euros (1,57%).
A administración xeral do Concello, dixitalización e participación cidadá supoñen o 16,37% do orzamento, con 3.032.423,30 euros. A partida para endebedamento será de 189.232,54 euros.
Co obxectivo de non repercutir o aumento dos custos nos cidadáns, as taxas e impostos continuarán conxelados, sen ningún tipo de incremento. A última suba impositiva significativa tivo lugar en 2023, afectando ao Imposto de Bens Inmobles (IBI) e ao Imposto de Vehículos de Tracción Mecánica (IVTM).
