O prazo para que as persoas interesadas poidan anotarse nas diferentes modalidades da Aula Municipal de Música do Concello de Bueu xa está aberto. As inscricións poderán realizarse entre o 21 e o 29 de setembro. As clases, que se impartirán na Casa da Música Manuel Omil, situada no Valado, darán comezo o vindeiro 6 de outubro e estenderanse ata o verán do próximo ano.
As disciplinas ofertadas inclúen solfexo, piano, conxunto musical (combo), batería e música activa. Para formalizar a inscrición, os interesados poderán presentar a solicitude a través do Rexistro Xeral do Concello ou mediante a Sede Electrónica, para o que se require certificado dixital.
Os criterios de admisión terán en conta a asistencia previa á Aula Municipal de Música na mesma modalidade e, como criterio preferente, estar empadroado/a no Concello de Bueu. As prazas asignaranse por orde de entrada no Rexistro Municipal e, en caso de quedar vacantes, realizarase un sorteo público. Crearase unha lista de agarda para cubrir posibles baixas durante o curso.
A actividade organizarase por niveis e grupos de idade. Haberá grupos para adultos (a partir de 16 anos), infantil/xuvenil (de 8 a 16 anos) e música activa (de 4 a 8 anos). Inicialmente, os alumnos distribuiranse por idade en grupos de 4 ou 5 persoas, podendo os profesores realizar axustes de nivel ao comezo do curso.
