Investigadores do Instituto Español de Oceanografía, do Instituto de Investigacións Mariñas e da Consellería de Medio Ambiente confirmaron que o botulismo aviario foi a causa directa da morte masiva de patos na ría doce de Cangas, situada en Punta Balea, durante os veráns de 2024 e 2025.
O informe, publicado na revista Environmental Science and Pollution Research, detalla que a perda destes animais estivo asociada á presenza de toxinas do tipo C e C/D, producidas pola bacteria Clostridium botulinum. O estudo tamén sinala un proceso de eutrofización e unha grave degradación do hábitat, evidenciado polo predominio de lenteixas de auga e proliferacións de euglenofíceas.
A investigación iniciouse formalmente no verán de 2024 tras as primeiras mortalidades observadas. Os técnicos analizaron a auga, tecidos e larvas dos exemplares mortos para avaliar as características fisicoquímicas da contorna e a composición do plancto.
O seguimento no verán de 2025 confirmou parámetros de calidade da auga deficientes, con niveis subóxicos de osíxeno disolto e elevados valores de demanda biolóxica e química de osíxeno. Estes datos corroboran a grave degradación medioambiental da ría e o incumprimento da Directiva Europea sobre Tratamento de Augas Residuais Urbanas nesta zona do municipio pontevedrés.
