A Consellería de Vivenda e Planificación de Infraestruturas anunciou a contratación destes traballos, que se prevé cofinanciar con fondos europeos Feder. O novo itinerario terá case un quilómetro de lonxitude e estará situado na marxe esquerda da vía autonómica, entre os puntos quilométricos 4+120 e 5+035.
A actuación tamén contempla obras complementarias, como a habilitación dunha parada de autobús preto do quilómetro 0+700 e a instalación de tramos de varanda ao longo do percorrido. A Plataforma de Contratos de Galicia xa recolle a licitación, e as empresas interesadas poderán presentar as súas ofertas ata o vindeiro 3 de agosto.
A conselleira María M. Allegue destacou que esta iniciativa se enmarca no compromiso da Administración autonómica coa mobilidade sostible e segura. Este tramo súmase aos xa executados na mesma estrada, completando así un itinerario de 5 km para desprazamentos a pé ou en bicicleta. "Queremos seguir dando a coñecer este fermoso concello de Marín con percorridos accesibles para a veciñanza e visitantes", sinalou.
A Xunta prevé axilizar a tramitación para adxudicar as obras neste segundo semestre do ano, cun prazo de execución de 12 meses. A conselleira indicou que o itinerario podería estar rematado no ano 2027.
Subliñouse tamén a coordinación desta actuación co Concello de Marín, que realizará traballos de saneamento e abastecemento na mesma contorna. A alcaldesa de Marín, que acompañou a conselleira, puxo en valor a colaboración entre ambas administracións para dotar aos veciños de "infraestruturas de calidade".
