O Goberno galego deu luz verde a catro acordos destinados á recuperación dos recursos marisqueiros tras os danos causados polas choivas do pasado inverno. Estes convenios, que contan cunha achega global superior a 1,6 millóns de euros, son cofinanciados polo Fondo Europeo Marítimo, de Pesca e de Acuicultura (Fempa).
Segundo informou a conselleira do Mar, Marta Villaverde, as profesionais do sector poderán percibir unha remuneración de ata 700 euros mensuais por participar en traballos de rexeneración durante 10 a 12 días ao mes, mentres os bancos permanezan pechados para a súa recuperación.
A Confraría de Pescadores Santiago Apóstol de Barallobre recibirá a maior parte do orzamento, con 1.330.185,76 euros. O proxecto actuará sobre 468.000 metros cadrados entre Punta do Seixo e Punta Pena do Ramo, coa participación de 22 mariscadoras a pé durante 144 xornadas. Inclúe a descompactación do substrato e a sementeira de diversas especies de ameixa, ostra e zamburiña.
Para a Confraría de Moaña destinaranse 133.679,80 euros, que coordinarán a 15 mariscadoras a pé nunha área de 642.612 metros cadrados nas praias da Xunqueira, Meira e Domaio. Máis do 93% dos fondos irán directamente a compensacións polas xornadas de acondicionamento e control de depredadores.
O convenio coa Confraría de Carril, dotado con 100.417,36 euros, centrarase nas intervencións nos bancos da praia da Concha de Compostela e A Fangueira. Case o 70% do orzamento financiará as tarefas de arado e retirada de macroalgas para 50 mariscadoras en quendas de catro horas.
A Agrupación de Mariscadoras Río Anllóns recibirá 60.254,80 euros para rehabilitar zonas produtivas na enseada e o estuario. O plan implicará progresivamente entre cinco e 11 profesionais e financiará a compra dun motocultor adaptado para embarcacións, dada a dificultade de acceso con maquinaria pesada.
Noutra orde de asuntos, o Consello da Xunta tamén recibiu información sobre as actuacións de Augas de Galicia para mellorar o saneamento e depuración na Ría de Pontevedra, que dará servizo a máis de 242.000 persoas. Destacan obras como o tanque de tormentas de A Seca e o bombeo de Porto Campelo en Poio, así como melloras en Mogor e o río Lameira en Marín e a estación de Cocheiras en Pontevedra.
