A Consellería do Mar, a través de Portos de Galicia, reformará de xeito inminente os paseos de madeira de Aldán, Cangas e Beluso para reforzar a seguridade do tránsito peonil. Esta actuación é o resultado da avaliación do estado destas instalacións en varios portos no marco dun plan transversal para conservación de paseos e pasarelas de madeira en dársenas de toda a comunidade.
As actuacións previstas consisten no recambio de madeiras tanto nos pavimentos destes paseos como nas varandas que os acompañan. Ademais revisaranse e substituiranse, no seu caso, os soportes sobre os que se asentan estas estruturas.
Portos de Galicia ten tramitadas estas actuacións que se prevé que dean comezo nas vindeiras semanas. Deste xeito o ente público pretende minimizar os riscos para os viandantes que percorren estas instalacións que forman parte das estruturas de integración entre os portos e as vilas que os acollen.
