O alcalde, Félix Juncal, louvou a figura do párroco, destacando que “demostraches dende o principio que querías formar parte da nosa comunidade, e gañaches o respecto de todo un pobo”. Juncal tamén puxo en valor a participación de Josecho na vida social, o seu acompañamento en momentos difíciles e a súa colaboración co concello.
Pola súa banda, o párroco mostrouse emocionado e agradeceu a acollida, manifestando o seu desexo de ser "un máis da comunidade, non só da católica senón do pobo e da cidadanía". Recoñeceu que para el foi "moi especial" estar na "casa de todos", xa que fixo "máis amizades fóra da igrexa que na propia igrexa".
Ao remate do acto, José López ‘Josecho’ foi agasallado cunha bandeira do municipio, un pin co escudo e varias publicacións sobre a historia municipal.
