A delegada da Xunta en Ferrol, Martina Aneiros, asistiu esta mañá en Monfero á entrega de premios da proba local do Circuíto de Cros Escolar, enmarcada no programa Xogade promovido pola Secretaría Xeral para o Deporte.
A representante autonómica felicitou aos 560 participantes procedentes dos centros CEIP Eladia Mariño (Cabanas), CEIP Couceiro Freijomil (Pontedeume), CPI Plurilingüe Virxe da Cela (Monfero), CEIP Plurilingüe Virxe do Portal (Sobrado dos Monxes), CEIP Plurilingüe Bragade (Oza-Cesuras) e IES Francisco Aguiar (Betanzos). A competición tivo lugar no contorno do mosteiro de Santa María de Monfero e incluíu as categorías cadete, infantil, alevín e benxamín.
O programa Xogade agrupa a oferta deportiva e lúdica da Administración galega, tanto escolar como federada, co obxectivo de fomentar a práctica deportiva en todos os concellos e permitir que a mocidade poida competir con clubs e centros educativos de toda Galicia.
O cros é unha das 16 modalidades deportivas convocadas dentro da actividade escolar de Xogade para este curso, xunto a atletismo en pista, bádminton, baloncesto, balonmán, dúatlon, encontros multideportivos, fútbol sala, multixogo 6-8, natación, orientación, patinaxe artística, tenis de mesa, voleibol, xadrez e xogando co atletismo.
