O Festival Internacional de Folclore de Pontedeume, que xa vai pola súa 37ª edición, celebrou este venres 7 de agosto as actuacións das culturas filipina e peruana. A agrupación Pasacat Philippine Performing Arts Company, fundada en San Diego (California) en 1970, e a organización peruana Identidad Perú, creada en 1993 e recoñecida polo Instituto Nacional de Cultura, foron as protagonistas da xornada.
Este sábado 8 de agosto, a partir das 20.30 horas na mesma praza de San Roque, o festival continuará coa participación da agrupación andaluza de Almería e dos anfitrións da AFC Orballo. Segundo explica a presidenta da asociación, Natalia Martínez, esta xornada estará máis centrada en actuacións dentro de España.
Ademais da música e o baile, as vestimentas tradicionais son un elemento clave para coñecer os diferentes folclores. Silvia Martínez destaca a diversidade dos traxes, que reflicten diferenzas climáticas e culturais. Na actualidade, véndense láminas e bolsas ilustradas coas siluetas dos traxes de Orballo para axudar a sufragar os gastos do evento.
A Asociación Folclórica e Cultural Orballo, organizadora do festival, naceu hai 47 anos co obxectivo de promover a cultura tradicional galega. A súa historia comezou coas clases na Escola de Folclore, e dende a súa integración na Federación Española de Coros y Danzas de España (Facyde) en 2004, buscaron mellorar a calidade dos grupos internacionais, en contacto con festivais integrados no Consello Internacional de Organizacións de Festivais de Folklore e das Artes Tradicionais (Cioff).
O cartel deste ano, o XXXVII Festival Internacional de Folclore de Pontedeume, é unha fotografía dunha artista senegalesa do Ballet Folclórico Jammu, gañadora do Certame de Fotografía Mateo González Miño, en homenaxe ao presentador do festival. As persoas inscritas no certame fotográfico poderán enviar ata catro propostas ata o venres 21 de agosto.
