O Concello de Pontedeume presentou a programación completa deste evento, que terá lugar os días 25 e 26 de abril na alameda de Raxoi. A iniciativa busca consolidar a vila como un punto de encontro clave para o sector queixeiro, reunindo a produtores, expertos e amantes do queixo.
“"Esta segunda edición reforza a aposta por consolidar Merca Queixo cunha programación completa e de calidade, que pon en valor o traballo dos produtores e converte Pontedeume nun referente arredor do queixo durante esa fin de semana."
A programación, deseñada para todos os públicos, combinará divulgación, gastronomía e ocio. Incluirá propostas especializadas e opcións máis lúdicas co obxectivo de atraer tanto á veciñanza como aos visitantes, dinamizando así o municipio. A feira abrirá as súas portas o sábado ás 10:30 horas e o domingo ás 11:30 horas, con actividades distribuídas en espazos como a alameda de Raxoi, a Casa da Cultura, a Praza Real e o Mercado Municipal.
Entre as propostas gastronómicas, destacan os showcookings a cargo de Nair González, do Restaurante Muelle 43, e de Antonio Amendedo, do Pazo de Mondoi. Tamén haberá un amplo programa de catas e presentacións de queixerías como Goine Berria, Gandería Quintián, Ojos del Guadiana, Pazo de Anzuxao, Castelo Brañas, Dona Cobiña, Doña Francisca e Queixos Feijoo. Ademais, Isabel Lozano dirixirá unha sesión sobre maridaxe con viño e vermú, e Tomás Rodríguez, fundador de Oxóco, impartirá unha charla-degustación sobre chocolate.
O evento contará coa participación de recoñecidos profesionais do sector, como Aitor Vega, mestre queixeiro e xuíz catador, e Ana Belén González Pinos, membro da Real Academia de Gastronomía, quen ofrecerá unha charla sobre a importancia dos queixos artesáns. A feira tamén incluirá actuacións musicais de grupos como Os Roleses - Gaiteiros de Urrós, Airiños do Eume, Silbarda ou AFC Orballo, e un concerto do grupo Black o domingo pola tarde. Para os máis pequenos, organizaranse obradoiros de elaboración de queixo e personalización de chapas.
Unha das iniciativas máis destacadas será unha poxa solidaria de queixos singulares, cuxa recadación se destinará á Asociación Española Contra o Cancro en Pontedeume. Tamén se realizará a ruta Stories con sabor coa experta Marta Medrán e implicarase á hostalería local para promocionar os queixos participantes.
