A expedición, composta por máis dun centenar de voluntarios e 24 membros da Asociación de Alfombristas de Ponteareas, traballou durante a noite e a madrugada do sábado para completar esta mostra de arte efémera. En total, cubríronse máis de 500 metros de lonxitude con deseños que acadan os tres metros de ancho.
Para a confección das pezas empregáronse máis de 30.000 caraveis, seleccionando principalmente as cores branca e amarela. As composicións artísticas integran elementos da iconografía cristiá, destacando a representación da Sagrada Forma e as chaves de San Pedro sobre unha cuncha de peregrino.
