O Concello de Ponteareas puxo en marcha oficialmente os preparativos para os seus máximos galardóns anuais. A Xunta de Goberno Local aprobou as bases reguladoras da convocatoria 2026 dos "Premios Menina Sarmiento – Ponteareáns/as Distinguidos/as do Ano". Esta iniciativa municipal, que celebra a súa segunda edición, busca recoñecer e valorar o talento, o compromiso, a solidariedade e a excelencia de persoas, entidades e colectivos vinculados ao municipio.
A gala de entrega dos premios terá lugar o vindeiro 26 de setembro no Auditorio Municipal Reveriano Soutullo. Alí, Ponteareas renderá homenaxe pública aos distinguidos, que recibirán un diploma acreditativo e unha peza conmemorativa polo seu labor en favor do progreso local. A denominación destes galardóns honra a María Agustina Sarmiento de Sotomayor, figura histórica da vila.
A alcaldesa de Ponteareas, Nava Castro, destacou o significado social e identitario da convocatoria, sinalando que "con estes premios queremos que Ponteareas recoñeza ás persoas, entidades e colectivos que contribúen cada día a facer un concello mellor e que, co seu traballo e compromiso, son tamén os nosos mellores embaixadores".
Castro subliñou o interese do goberno local en abranguer todo tipo de perfís comunitarios, "queremos poñer nomes e rostros ao talento que existe no noso concello, agradecer traxectorias de toda unha vida, pero tamén descubrir novas promesas e iniciativas que están contribuíndo ao progreso de Ponteareas. Os Premios Menina Sarmiento son, sobre todo, unha celebración do orgullo de ser ponteareán".
As bases aprobadas establecen nove categorías específicas: Cultura; Educación, Ciencias e Investigación; Empresa e Innovación; Compromiso Social; Inclusión; Deportes; Nova Promesa (para menores de 25 anos); Embaixada de Ponteareas; e Emigración/Aveciñamento. Concederase un máximo dun premio por categoría.
As candidaturas deben ter unha vinculación directa co concello. As propostas poderanse presentar a través da modalidade institucional (Alcaldía, concellerías, asociacións) ou da modalidade popular, que require 2.350 sinaturas ou o formulario dixital habilitado. O prazo de presentación será de cinco días hábiles tras a publicación no Boletín Oficial da Provincia de Pontevedra (BOPPO).
A Comisión Técnica municipal comprobará as candidaturas, que logo serán avaliadas por un xurado de entre sete e dez membros. As categorías poderán declararse desertas se ningunha proposta alcanza os 50 puntos ou non hai méritos suficientes.
