Ponteareas prepárase para converterse este venres e sábado no epicentro comercial e musical da comarca coa celebración da segunda edición do "OuleTea" de verán e o festival urbano "The Jazz Street". A feira de oportunidades busca impulsar o comercio de proximidade, mentres que a programación musical achegará jazz, blues e ritmos de fusión ás rúas.
O concelleiro de Comercio, Ricardo Gónzalez, destacou que "OuleTea" forma parte da estratexia municipal para liquidar o stock de verán, ofrecendo "produtos de calidade con descontos únicos na rúa". O obxectivo é "reter o consumo interno e atraer compradores de toda a comarca", segundo engadiu.
O dispositivo comercial funcionará na tarde do venres 7 de agosto, de 20:00 a 24:00 horas, e o sábado 8 de agosto de 09:00 a 15:00 horas, mantendo os horarios da edición anterior para favorecer o descanso e optimizar as horas de maior afluencia.
A Praza Maior e as rúas de Ponteareas transformaranse nun escenario urbano co "The Jazz Street". A programación musical inclúe jazz clásico, blues, música klezmer e ritmos de fusión.
O venres, a partir das 20:00 horas, haberá un "Recuncho infantil" con xogos tradicionais de madeira. Actuarán o "David Taboada Quartet", "Teshuva Band" (klezmer), e a "St. James Dixie Band" (pasarrúas). Tamén haberá un "Obradoiro de baile swing" ás 22:30 horas e pechará "Layuca" ás 00:30 horas na Praza.
O sábado, a xornada comezará ás 20:00 horas co "Recuncho infantil" e a actuación do "Diego Nogueira Quinteto" (jazz, latín, funk, folclore galego). Seguirán o "David Guerreiro Cuarteto" (jazz contemporáneo) ás 21:20 horas, e outro "Obradoiro de baile swing" ás 22:20 horas.
A última actuación do sábado será a de "Mr. River" ás 23:20 horas, cun son propio que mestura jazz, rock, blues, funk e música tradicional galega. Inicialmente previsto, o "Valentín Caamaño Quartet" caeu do cartel por problemas de saúde.
