A Consellería do Medio Rural destinou máis de 139.000 euros ao desenvolvemento de tres pasteiros nos concellos de Ponteareas e Covelo. Estas infraestruturas, que abranguen unha superficie total de 18,5 hectáreas, contaron con investimentos en preparación do terreo, construción de novas infraestruturas e acondicionamento para o benestar do gando.
En Ponteareas, o pasteiro impulsado no monte veciñal en man común de Padróns conta cunha extensión de 2,5 hectáreas e un investimento de 35.122,40 euros. Os traballos incluíron roza mecanizada, destoconados, colocación de caliza, abonado, sementeira, e a construción dun peche perimetral de 1,5 metros de altura con dúas cancelas.
Na localidade de Covelo desenvolvéronse dous pasteiros. Un deles, pertencente ao monte veciñal de Casteláns, abrangue sete hectáreas e requiriu un investimento de 74.200 euros para un peche perimetral, cancelas e un comedeiro para becerros.
O segundo pasteiro en Covelo, con 9 hectáreas, recibiu un orzamento de máis de 30.000 euros para roza mecanizada, abonado, sementeira e pase de rulo.
“"Este tipo de infraestruturas contan con múltiples vantaxes, xa que favorecen o coidado do gando en extensivo e axudan a protexer o territorio."
A creación destes pasteiros enmárcanse dentro do Plan de Pastos de Galicia, que dende o ano 2020 permitiu a mobilización de case 2.500 hectáreas en 106 pasteiros, cun investimento global de cerca de 15 millóns de euros.
