A Xunta de Galicia vén de aprobar o Plan especial de infraestruturas e dotacións para a execución dun centro de día no núcleo rural da Devesa, na parroquia de San Xulián de Guláns, no concello pontevedrés de Ponteareas. O obxectivo é a ordenación de terreos de solo rústico para a creación deste novo equipamento público asistencial.
O informe ambiental estratéxico (IAE) da Consellería de Medio Ambiente e Cambio Climático sinala que non se prevén efectos adversos significativos se se cumpren as condicións establecidas. Estas inclúen melloras na xestión da auga, accesibilidade e integración paisaxística mediante o emprego de especies e portes axeitados.
O procedemento de avaliación ambiental estratéxica simplificada someteu a documentación a consulta de organismos públicos e ao público en xeral, sen que se recibisen observacións.
O plan especial busca ordenar 4.955 metros cadrados de solo rústico, pertencentes a unha única parcela municipal, para construír o centro de día. Tamén se prevé a creación dun viario público anexo con 8 prazas de aparcadoiro, unha delas adaptada para persoas con mobilidade reducida.
A contorna do futuro centro xa conta con equipamentos municipais como a casa da cultura, instalacións deportivas e a escola de música.
