Estas subvencións enmárcanse nunha liña provincial de apoio aos sectores pesqueiro e marisqueiro, buscando mellorar a capacidade operativa, os medios materiais e as condicións das instalacións onde desenvolven a súa actividade diaria.
A confraría de Aguiño recibirá 17.360 euros para dúas actuacións clave: a adquisición dun remolque isotérmico para o transporte de produtos pesqueiros frescos ata a lonxa e a mellora integral da súa sede. Esta última incluirá a dotación de mobiliario, equipamento e sistemas de climatización. O remolque permitirá garantir a conservación, hixiene e seguridade alimentaria dos produtos, beneficiando directamente a 213 persoas vinculadas á descarga, manipulación e comercialización.
Pola súa banda, a confraría de Ribeira contará cunha achega de 5.420 euros. Este importe destinarase á reparación do tellado, o acondicionamento do desván e a mellora da fachada do edificio. Estas intervencións buscan corrixir deficiencias, evitar filtracións e asegurar un mellor estado xeral das instalacións.
“"Estas axudas teñen unha utilidade directa para o día a día das confrarías. As confrarías son pezas fundamentais na economía do mar, na organización da actividade pesqueira e marisqueira e na vida social dos portos, polo que a Deputación seguirá apoiando investimentos que reforcen a súa capacidade de traballo e contribúan a modernizar o sector."
Con estas subvencións, a Deputación da Coruña reafirma o seu compromiso co tecido pesqueiro e marisqueiro de Ribeira, un dos principais motores económicos da comarca do Barbanza, contribuíndo á mellora de equipamentos e instalacións que impactan directamente na actividade diaria dos profesionais do mar.
