O mercado, que se celebra no Malecón, conta coa participación dunha trintena de profesionais que elaboran alimentos adheridos a distintivos recoñecidos en Galicia. O obxectivo é favorecer unha relación máis directa entre produción e consumo, permitindo aos operadores presentar os seus propios produtos e aos consumidores coñecer e degustar as elaboracións, identificando a súa orixe e o territorio.
A programación inclúe presentacións e catas de viños, como as singulares da IXP Terras do Navia e produción ecolóxica, así como propostas de doces e cócteles elaborados con licores e augardentes tradicionais. As actividades estarán amenizadas con actuacións musicais, como O Cego na Feira e Music Box. The Band.
A conselleira, María José Gómez, destacou o labor dos produtores, vencellados ao rural, que contribúen a manter a actividade económica, fixar poboación e crear emprego.
Esta iniciativa forma parte do Plan Saborea Galicia Calidade Diferenciada, que conta cun orzamento de 10 millóns de euros para este ano. A vindeira fin de semana, o mercado terá unha segunda cita en Viveiro.
