A Deputación de Lugo leva máis de vinte anos ofrecendo rutas en catamarán pola Ribeira Sacra, unha iniciativa que naceu antes da actual proxección turística da comarca e que se converteu nun dos principais atractivos da provincia. Estas viaxes son fundamentais para a difusión do seu patrimonio natural, cultural e paisaxístico.
Navegar polos ríos Miño e Sil permite contemplar desde unha perspectiva privilexiada os espectaculares canóns, os viñedos en socalcos da viticultura heroica e os mosteiros que definen a identidade histórica da zona.
Esta combinación de paisaxe, patrimonio e natureza fai das rutas fluviais unha das experiencias turísticas máis demandadas en Galicia. Miles de visitantes escollen cada tempada descubrir a Ribeira Sacra desde a auga, nun territorio que aspira ao recoñecemento da UNESCO como Patrimonio da Humanidade.
Os datos confirman este interese crecente. Só na pasada Semana Santa, máis de 2.400 persoas participaron nestas rutas. Ao longo da tempada turística, que vai de marzo a decembro, máis de 60.000 visitantes embarcan anualmente nos catamaráns.
Actualmente, a institución provincial conta con tres embarcacións: o catamarán Mencía e o monocasco Canón do Sil desde Ponte do Sil, e o catamarán Pelegrín desde Belesar, que realiza a ruta de Cabo do Mundo.
As persoas interesadas poden consultar horarios, itinerarios e adquirir billetes na web www.rutasembalses.es ou no teléfono 982 26 01 96.
