O Comité de Patrimonio Mundial da UNESCO xa se atopa reunido en Busán (Corea do Sur). Tras varios días de deliberación, que comezaron coa revisión de sitios xa inscritos, a decisión sobre a Ribeira Sacra chegará a partir do vindeiro luns, cando se examinarán as candidaturas que aspiran á distinción. Segundo a orde establecida, a proposta do Paisaxe do Auga da Ribeira Sacra será a primeira en ser debatida polo comité de 21 países.
O presidente do consorcio de turismo e alcalde de Sober, Luis Fernández Guitián, cualifica de "moi positivo" o feito de chegar ata aquí, destacando que a candidatura xa xerou "moito en investimento" e un "espectacular" posicionamento internacional para o territorio. Guitián confía na solidez da candidatura e nas xestións do embaixador de España ante a UNESCO, Miquel Iceta, e do director xeral de Patrimonio Cultural da Xunta, Ángel Miramontes.
“"Xa se conseguiu moito, chegar ata aquí é moi positivo"
A candidatura é coñecida entre a poboación, aínda que a transcendencia inmediata da reunión do comité non é alta entre os veciños. Mar López, dependenta dunha papelería en Monforte, percibe que "non é algo do que se fale moito", pero valora os pros e contras da declaración, especialmente de cara ao turismo, aínda que teme que poida haber "sitios en los que haya pedir cita".
Pola súa banda, Domingo Pérez, propietario dunha xoiería, considera que a declaración sería "beneficiosa para a zona". Non obstante, Manuel Novo, vendedor da Once, móstrase máis crítico e sinala a necesidade de "facer a Ribeira Sacra máis accesible, para os que vivimos aquí, por suposto, pero tamén para os turistas", criticando o estado dalgunhas vías.
Desde Bazar Varela, Juan Arias cre que a distinción "pode vir ben a nivel económico, porque atraerá á xente", e destaca a rehabilitación de casas para turismo nos últimos tempos. "Non creo que traia nada malo ser Patrimonio Mundial", conclúe.
