O proxecto EMICOU (Estratexia de Mobilidade Intelixente Conectada de Ourense) chega á provincia co obxectivo de transformar a mobilidade ante as dificultades da dispersión poboacional. Esta iniciativa ponse en marcha na Ribeira Sacra, unha zona clave para o turismo ourensán, para solucionar a súa falta de conexión.
A presentación oficial desta alianza institucional e empresarial tivo lugar onte na Estación Intermodal de Ourense. O proxecto é impulsado pola Deputación de Ourense, a Asociación de Mozos Empresarios (AJE) e a empresa ourensana Mobify. Inicialmente, unha vintena de coches 100% eléctricos da frota de Mobify destinarase á Ribeira Sacra, con puntos de recollida e devolución visibles na aplicación móbil.
“"O futuro da nosa provincia non se constrúe só na cidade, constrúese en cada recuncho. EMICOU é un punto de partida."
Noelia Rodríguez, presidenta de AJE Ourense, destacou que a asociación pon a súa rede ao servizo deste modelo, invitando a mirar EMICOU como "un punto de partida".
“"Un servizo como o noso é esencial no noso territorio, e por iso non podemos irnos dunha terra que nos ten dado todo e á que agora temos a obriga de devolverllo."
A directora de operacións de Mobify, Nuria Iglesias, lembrou o crecemento da compañía, que pasou de 10 a 80 coches en catro anos, e subliñou a importancia do servizo para o seu territorio de orixe.
“"Darlle a solución de mobilidade á Ribeira Sacra significa que se pode trasladar a calquera lugar. O obxectivo é achegarse dun xeito sostible e eficaz, buscando primeiro a satisfacción dos habitantes e dos moitísimos visitantes."
O presidente da Deputación, Luis Menor, sinalou que ofrecer solucións de mobilidade á Ribeira Sacra é un modelo extensible a toda a provincia, co fin de lograr unha "solución integral" que beneficie tanto aos habitantes como aos visitantes de xeito sostible e eficaz.
Como medida complementaria, Menor anunciou a apertura dun gran centro de recepción de visitantes en Pereiro de Aguiar, que actuará como porta de entrada á Ribeira Sacra. Este espazo buscará ordenar os accesos e canalizar os viaxeiros cara a transportes sostibles para evitar a saturación turística e preservar o patrimonio natural e cultural da zona.
