O deporte será o protagonista do inicio das festas do Nazareno na Pobra do Caramiñal o vindeiro venres 18 de setembro, coa celebración de dúas probas: a LXV Milla Urbana Nocturna e o Open Integrado de Tenis de Mesa. Ambas as citas buscan fomentar a práctica deportiva e a participación de persoas de diferentes idades e capacidades.
A Milla Urbana Nocturna, organizada polo Concello xunto á Asociación de Atletismo e Deportes do Barbanza, regresa como un clásico. A proba, aberta a todas as idades desde sub-6 ata máster, terá as súas saídas e meta nas inmediacións dos xardíns de Valle-Inclán a partir das 21.50 horas. Entregaranse trofeos ás tres primeiras persoas clasificadas por categoría e medallas aos máis novos, ademais de premios económicos de 150, 100 e 50 euros para os tres primeiros tempos absolutos.
As inscricións para a carreira poden realizarse presencialmente no Departamento de Deportes (9.30 a 14.30 h) ou chamando aos teléfonos 981 831 545 e 619 229 946.
Pola mañá, a partir das 10.30 horas, o polideportivo de Venecia acollerá o Open Integrado de Tenis de Mesa. Organizado pola Agrupación Deportiva Costa Oeste-Deporte Adaptado (ADECO-DEA), coa colaboración do Concello da Pobra do Caramiñal, conta con tres categorías: menores de 14 anos, sénior (maiores de 14) e persoas con discapacidade.
Para participar no torneo de tenis de mesa, as inscricións formalízanse vía correo electrónico a [adeco.dea@gmail.com](mailto:adeco.dea@gmail.com) ou directamente no polideportivo antes das 10.30 horas.
Desde o Concello, considérase que dar protagonismo ao deporte e promover a participación interxeracional é a mellor forma de comezar as festas do Nazareno, agradecendo a colaboración de todas as entidades e persoas implicadas.
