A deseñadora e artesá María Alborés, orixinaria de Boiro (A Coruña), está a dar un paso decisivo na súa carreira ao ser contratada pola recoñecida casa de moda francesa Dior. A decisión da emblemática marca chegou despois de valorar a colección que Alborés creou como traballo final do seu máster.
A publicación Elle España, a través dunha peza asinada pola súa Xefa de Moda, Paula Llanos, destacou o talento da moza creadora. A revista eloxia a colección Lost in Tradition, Found in Galicia, desenvolvida pola exalumna da UVigo durante a súa estancia na Antwerp Academy en Bélxica.
Segundo Elle, Alborés conseguiu "enamorar" á casa francesa co seu enfoque artesanal. Este tipo de traballo manual, que ademais reflicte os códigos culturais da súa orixe, é especialmente valorado no sector da alta costura actual.
A revista subliña que a xeración de Alborés pode ser un "motor de cambio" na industria, empregando elementos tan recoñecibles da tradición galega como redes de pesca, cordas, encaixe de bolillos e fibras naturais. A súa incorporación ao equipo de deseño de Dior promete elevar a artesanía galega ao nivel da alta costura, revalorizando oficios tradicionais como selo de distinción e calidade.
“"O orgullo que sinto como xefa de moda en Elle, e que deberiamos sentir todos como españois, é enorme, porque non só pon en valor o noso, senón que nos reconcilia coa posibilidade de que haxa un futuro para a artesanía, os pequenos oficios e para os deseñadores mozos españois."
