A operación Besteiros, levada a cabo pola Garda Civil de Boiro, culminou coa detención de cinco individuos residentes en Boiro, Caldas de Reis, Barro e Meis. Aos implicados atribúeselles a presunta autoría de delitos de furto, receptación e maltrato animal, con consecuencias de lesións graves e a morte de varios exemplares.

A investigación iniciouse tras a desaparición sistemática de gando en diversas zonas de pasto situadas na Serra do Barbanza. O grupo operaba de forma coordinada, subtraendo reses que posteriormente eran vendidas a membros dunha asociación gandeira. Para dificultar a identificación dos animais polos seus lexítimos propietarios, os implicados modificaban os trazos identificativos nas orellas das reses, realizando novas marcas sobre as orixinais e causando lesións sen supervisión veterinaria.

Durante o transcurso da investigación, confirmouse a morte de cinco animais por impactos de arma de fogo. Como resultado, interviñéronse cinco escopetas de caza, presuntamente empregadas por un dos implicados para efectuar os disparos. O operativo finalizou coa devolución das reses aos seus propietarios de Boiro, Porto do Son e Lousame, logrando o esclarecemento total dos feitos denunciados.

Os cinco detidos foron postos en liberdade tras prestar declaración nas dependencias oficiais da Garda Civil de Boiro. As dilixencias instruídas polos delitos mencionados foron remitidas ao Tribunal de Instancia de Garda de Ribeira.