Durante tres noites, recoñecidos investigadores e profesores de institucións como a Universidade de Santiago de Compostela, a Universidade de Porto e a Universidade Internacional de La Rioja, xunto con expertos da Axencia Espacial Europea e da Misión Biolóxica de Galicia, sairán dos seus laboratorios para compartir coñecemento coa cidadanía nun formato accesible e distendido.

As charlas, que terán lugar sempre ás oito da tarde, distribuiranse en tres establecementos: A Terraza do Furancho, Ginlab e Cervecería Gilligams. O programa inclúe seis presentacións sobre temas variados, desde o impacto de especies invasoras ata a adaptación dos moluscos ao cambio climático e a intelixencia artificial.

O festival comezará o luns 18 no Gilligams, onde se abordarán temas como o impacto da Tradescantia fluminensis nas ribeiras e a orixe da auga. O martes 19, en A Terraza do Furancho, falarase sobre a adaptación dos moluscos ao cambio climático e o funcionamento das células. Finalmente, o mércores 20, o Ginlab acollerá charlas sobre o cultivo in vitro de especies forestais e a reflexión sobre o pensamento na era dixital.

Con esta iniciativa, Boiro únese a centos de cidades en todo o mundo que promoven a divulgación científica fóra das aulas e congresos, fomentando o debate e a participación do público. Os asistentes tamén poderán participar en sorteos e recibir agasallos.