O municipio de Boiro prepárase para celebrar as súas festas de verán, que darán comezo o venres 3 de xullo. O alcalde, José Ramón Romero, e a concelleira de Cultura, María Outeiral, presentaron un programa deseñado para todos os públicos e idades, combinando grandes actuacións con propostas locais.
A xornada inaugural contará cun pasarrúas da charanga BB+ e a actuación da orquestra Suavecito na Praza de Galicia. O pregón, previsto para as 22.00 horas, será protagonizado por representantes do comercio tradicional, colectivo ao que se lle rende homenaxe este ano. A noite continuará coas orquestras Capitol (na Praza de Galicia), Curi e Sound Ivan (na praza do centro social), e o Remember Fest organizado pola asociación Peñas Boiro no Parque da Cachada.
O sábado 4 estará marcado pola tradicional Festa da Malla ao mediodía, amenizada por Xilbarbeira e Aroña. Pola tarde, actuará a orquestra Finisterre Project, e pola noite, a Praza de Galicia acollerá un Tributo a Julio Iglesias, mentres que Ortiga animará a noite na Praza da Terceira Idade.
O domingo 5 traerá alboradas con Ar de Loureda, baile con Abeloura, Ballet Folclórico Boirense e Abanqueiro, ademais dun pasarrúas da Banda de Negreira e unha sesión vermú na rúa peonil con D’Crooners. O gran espectáculo piromusical na praia de Barraña será o prato forte, seguido de verbenas con La Oca Band e La Banda de Ayer (na Praza de Galicia) e Balbina coa Banda de Música de Boiro (na praza do centro social).
O luns 6 haberá Cantos de Taberna ao mediodía con As da Boina e Mar de Cabo, e o Día das Peñas no Parque da Cachada. Pola noite, Gramola Gominola actuará na praza do centro social, e as orquestras Gran Parada e Origen na Praza de Galicia.
O martes 7 volverán os Cantos de Taberna con A Dorniña e Xoaniñas, e pasarrúas de Treboada. A verbena nocturna na Praza de Galicia estará protagonizada polas orquestras Marbella e París de Noia, mentres que Melidaos e Lumieira actuarán na Praza da Terceira Idade.
O mércores 8, os Cantos de Taberna correrán a cargo de Nunca é tarde e Ventos do mar, e a sesión vermú na rúa peonil amenizarase con Duendeneta. O gran fin de festa incluirá a actuación de 9Louro na Praza da Mancomunidade, e a verbena final coas orquestras Panorama, América e Satélites na Praza de Galicia.
María Outeiral destacou que "Todos os días se reparten as actuacións en distintos escenarios pensando nos distintos públicos; deseñamos un programa pensando en todos os gustos e idades". Pola súa banda, o alcalde José Ramón Romero convidou a veciñanza e os arredores a gozar "deste gran programa de actividades que mestura grandes orquestras con actuacións de grupos locais e outras propostas para todos os gustos".
