O director xeral de Cultura, Anxo M. Lorenzo, destacou hoxe a "ampla e diversa programación" da Feira do Libro de Rianxo, que se celebra na Praza Castelao ata o vindeiro domingo. Esta feira é a novena parada dun circuíto impulsado pola Xunta de Galicia en colaboración coa Federación de Librarías de Galicia, como parte da campaña 'Para gustos, cultura'.
Lorenzo gabou o encontro por "reunir a maiores e pequenos cun único obxectivo: desfrutar da lectura e achegarnos un pouco máis a nosa cultura". Tamén sinalou estas citas como un "pulo imprescindible ao noso sector editorial", que, segundo datos recentes, viu como un 67,1 % da poboación galega mercou algún libro no último ano.
A programación inclúe teatro, unha charla-coloquio, sinaturas de libros con autores e autoras, presentacións de novidades editoriais, música e ilusionismo. Tras a apertura co pregón do escritor Anxo Angueira, a feira estará aberta en horario de 12,00 a 14,00 e de 18,30 a 22,00 horas, agás o sábado, que comezará ás 11,00.
A feira de Rianxo é a novena de 13 citas que percorren Galicia este ano. Tras pasar por cidades como Ferrol, Santiago de Compostela, Lugo, O Porriño, Ourense, Redondela, Vigo e Ponteareas, o circuíto continuará en agosto na Coruña (do 1 ao 10), Viveiro (do 13 ao 19), Foz (do 20 ao 23) e rematará en Monforte de Lemos (do 26 ao 29).
