O evento, que terá a súa saída na explanada de Coroso a partir das dez da mañá, consolídase como un referente de convivencia e inclusión na comarca. Este ano, a principal novidade é a introdución dunha proba lúdica de 2,5 quilómetros, pensada para aqueles que desexen gozar do percorrido camiñando, en familia ou coas súas mascotas, sen a presión do cronómetro, pero con diversas actividades e sorpresas ao longo do traxecto.
As inscricións xa están abertas na web oficial de Cronotec e pecharanse o 5 de maio, cunha cota de participación de 7,50 euros. O evento inclúe varias categorías: a modalidade absoluta mixta (5 km) para Sub-18, Senior e Máster (1, 2 e 3); a modalidade inclusiva (5 km) para Zapatilla Inclusiva (diversidade intelectual, sensorial ou motriz), handbike e cadeira de atletismo; e a modalidade lúdica (2,5 km), aberta a todas as idades e con opción de participar con mascotas. Para quen non poida asistir pero desexe colaborar, está dispoñible a opción do dorsal 0.
“"Trae actividades un pouco máis divertidas que se desvelarán o propio día."
Joserra Filgueira, responsable da área de Deporte da organización técnica, destacou que, ademais das modalidades competitivas habituais, a proba lúdica será a gran sorpresa desta edición. Pola súa banda, Jonatan Lijó, usuario de Ambar e integrante do equipo de running, compartiu a súa experiencia de preparación e animou á cidadanía a participar.
A recadación desta edición destinarase integramente ao proxecto “Ecosistema de vivendas inclusivas e servizo de apoio á comunidade”. Esta iniciativa busca rehabilitar as antigas vivendas dos mestres en Praia Xardín (Boiro) para crear aloxamentos permanentes, temporais e de transición. Cun investimento próximo ao millón de euros, o obxectivo é fomentar a autonomía das persoas con diversidade e permitirlles escoller o seu modo de vida.
“"O recadado este ano será para o proxecto das vivendas de ecosistema inclusivo, onde as persoas con diversidade aprenden a desenvolver a súa vida diaria."
A presidenta de Ambar, Milagros Rey, subliñou a importancia deste recurso como unha “necesidade urxente” para a autonomía das persoas con diversidade. O concelleiro de Deportes, Álex Vidal, reafirmou o apoio do Goberno local a Ambar, cualificándoa como “un orgullo para o municipio” e destacando a importancia de mellorar a vida das persoas, independentemente da súa diversidade.
