A Festa da Dorna de Ribeira chegou este luns ao seu ecuador, cunha xornada marcada pola troula, a retranca e a creatividade dos seus participantes. Miles de persoas congregáronse para presenciar como as peñas se lanzaban á auga a bordo de aloucados artefactos.
No Jran Premio Ícaro de voo sen motor participaron este ano 34 agrupacións, cuxos nomes xa adiantan o sentido do humor da festa, como 'Ollomol en formol' ou 'As marajotas van de copas'.
Dende o peirao comercial, as peñas saltaron á auga con dispositivos que ían dende unha sinxela carta de cartón, dirixida á alcaldesa, ata un espectacular portaavións que incluso disparou un mísil. Outras embarcacións incluíron un dragón, unha xigante pamela ou unha nave con sombriña.
Os participantes demostraron que había que saltar, voar e mollarse, utilizando dende latas de conservas ata o 'Indirigible Sepelín' ou unha nave con sombriña e cadeira de praia.
A reivindicación do festivo local para o día central da festa tamén tivo presenza, así como un artefacto que facía referencia ao éxito da Selección Española de Fútbol, baixo o título 'A boia do mundo é nosa'.
As 'tropas dorneiras' avanzaron por terra, mar e aire, ampliando o imperio desta Festa de Interese Turístico de Galicia. A celebración continúa ata o venres con eventos como a final do certame de canción de tasca, concertos e o exame de patróns.
O mércores celebrarase a Batalla dos jallos dorneiros, o xoves o Exame de patróns para novas peñas, e o venres a esperada Rejata Cutre Shark de embarcacións feitas á machada na praia de Coroso.
