Preto de medio centenar de autores e autoras presentarán os seus libros ou participarán en conferencias e mesas redondas ao longo de tres días. As actividades terán lugar no Espazo Sociocultural e nos edificios Francisco Sánchez e da praza da Inmaculada.
As escritoras Rosa Montero e Mafalda Santos son as convidadas de honra, representando a calidade literaria en fantasía da península ibérica. Ambas manterán un encontro coa tamén escritora Lola Robles o sábado ás 19:00. Ademais, Montero ofrecerá unha charla o venres ás 19:15 e Santos o domingo ás 11:15.
Mariano Martín, Premio Europeo de Ciencia Ficción en Tradución, afondará na fantasía épica o venres cunha charla sobre antoloxías históricas e críticas, e o sábado abordará a fantasía épica breve en galego e portugués. A arquitectura tamén terá protagonismo coas intervencións de Javier del Moral ou Cristina Rausell.
Na convención presentaranse obras como “Sombras del Pasado” de Eduardo Gallego e Guillem Sánchez, ou “El secreto de la reina” da escritora tudense Conchi Regueiro. Tamén se darán a coñecer traballos autopublicados e novidades editoriais de xénero fantástico por parte de editoriais como Galaxia, Libros del Salvaje e Cerbero.
O sábado, Pedro García Bilbao analizará as ucronías na ciencia ficción e participará na Aznarcon 2026, unha mesa redonda sobre a saga dos Aznar. O portugués Luís Filipe Silva conversará sobre utopías e distopías na ficción científica lusitana. Pola súa banda, Ramón Caride presentará a tradución do seu libro “Exogamia” nunha conversa con Gabriel Romero de Ávila, Miguel García Fernández e Francisco Álvarez “Koki”.
O teatro tamén terá presenza coas charlas de Ana Saiz, Andrea Valeiras, Talita Isla, Inés Galiano, David Fernández ou Elena Torró.
En total, 48 autores e autoras participan nesta edición, que ofrece máis de 40 actividades abertas á cidadanía. A programación completa está dispoñible en hispacon.org.
