O Concello de Tomiño renova por segundo ano consecutivo a Bandeira Verde de Galicia, un galardón concedido pola Xunta que distingue os municipios galegos comprometidos coa protección do territorio, o uso responsable dos recursos e a mellora da calidade de vida da veciñanza.
A concelleira de Medio Ambiente, Ana Belén Casaleiro, recolleu o premio o pasado 21 de outubro en Vedra, destacando que o recoñecemento "avala unha forma de gobernar que incorpora o coidado do medio ambiente ás decisións municipais". Sinalou que "detrás hai anos de planificación e actuacións concretas" e que a distinción é un "respaldo ao traballo realizado e un impulso para seguir avanzando".
A memoria presentada polo Concello detalla medidas de transición enerxética, como a adhesión ao Pacto das Alcaldías polo Clima e a instalación de enerxías renovables en edificios municipais. En conservación do patrimonio natural, destacan o catálogo de árbores senlleiras e a campaña «Rodéate de vida» para a prevención de incendios.
En materia de residuos, a compostaxe impulsada polo Plan Revitaliza reduciu un 11% a fracción resto por habitante. O novo modelo municipal «O Grilo Verde» mellora a eficiencia co servizo porta a porta de biorresiduos e o punto limpo móbil. No ámbito da auga, realizouse unha auditoría do saneamento e redactouse un Plan de Seca.
Casaleiro tamén subliñou a contribución cidadá: "A veciñanza é parte fundamental destes avances, desde a separación dos residuos ata o coidado das parcelas e a participación nas actividades ambientais. Esta Bandeira Verde recoñece tamén esa implicación e anímanos a continuar con medidas útiles e adaptadas á realidade das nosas parroquias".
