O Concello de Tomiño despediu recentemente ao compositor Ademar Álvarez Álvarez, quen regresou á Arxentina despois dun verán marcado polos reencontros arredor da súa obra «Adiós Tomiño». Esta peza, composta pouco antes da súa emigración, forma parte intrínseca da historia da emigración tomiñesa.
Durante a súa estancia, Álvarez doou ao Espazo Isaura Gómez unha copia da partitura orixinal e outros materiais significativos da súa carreira. Estes elementos pasarán a formar parte do legado cultural do municipio, testemuño da súa vinculación coa terra que lle deu nome.
“"Ademar escribiu “Adiós Tomiño” para despedirse da súa terra e, tantos anos despois, a peza segue soando da man de numerosas bandas galegas. Foi unha alegría velo entregar a partitura á Agrupación Musical de Goián e dirixir el mesmo a obra durante as festas. Tomiño é a súa casa e agradecémoslle que siga levando o seu nome consigo alá onde vai."
Este verán foi especialmente emotivo para o compositor, vivindo dous momentos clave coa súa música. O 28 de agosto, entregou persoalmente unha copia da partitura á Agrupación Musical de Goián durante o seu concerto de verán. Posteriormente, nas Festas do Alivio, tivo a oportunidade de dirixir á Agrupación Musical do Rosal na interpretación de «Adiós Tomiño», dous eventos que permitiron escoitar a obra na súa terra natal e compartila con novas xeracións.
Ademar Álvarez, nacido en Tomiño en 1938, iniciou os seus estudos musicais co seu irmán Enrique e formou parte da banda Unión Musical de Tomiño. En 1958, antes de emigrar á Arxentina, creou «Adiós Tomiño», interpretada por primeira vez nun concerto de despedida pola mesma banda. A peza acompañouno no seu periplo transoceánico, revisándoa ao longo dos anos mentres desenvolveu unha prolífica carreira como instrumentista, compositor e director, culminando coa estrea da súa versión definitiva en Bos Aires en 1983. Desde entón, o pasodobre foi interpretado por multitude de formacións musicais en Galicia e fóra dela.
