O proxecto busca ensinar a identificar comportamentos de risco nas relacións dixitais e promover relacións saudables e igualitarias. A iniciativa, desenvolvida no marco do programa municipal Revolucionando Mentes, conta co financiamento da Deputación de Pontevedra e coa colaboración da Asociación Galega de Comunicación para o Cambio Social (Agareso).
O alumnado de 5º e 6º de Educación Primaria xa participou nun encontro para reflexionar sobre os riscos das relacións dixitais e aprender a diferenciar as red flags (sinais de alerta) das green flags (comportamentos positivos). O alumnado tamén participará na elaboración de contidos comunicativos para trasladar estas mensaxes á veciñanza.
O proxecto responde ás preocupacións trasladadas polo grupo de participación infantil e xuvenil Fogaric@s, que no pleno infantil de 2025 sinalou cuestións como o ciberacoso, o uso de imaxes sen consentimento e a presión para enviar fotografías íntimas.
“"Temos a responsabilidade de darlles ás novas xeracións ferramentas para recoñecer situacións de violencia machista disfrazadas de preocupación ou de supostas mostras de cariño. Só así poden recoñecer esas situacións, poñer límites e construír relacións nas que ninguén teña que renunciar á súa liberdade nin á súa intimidade."
O proxecto inclúe unha sesión formativa aberta ás familias o luns 9 de novembro, ás 18.45 horas, no CPI Manuel Suárez Marquier, centrada no uso responsable das novas tecnoloxías. Tamén haberá unha formación específica para o persoal técnico de asociacións culturais e deportivas o xoves 12 de novembro.
A concelleira de Igualdade, Beatriz Rodríguez, subliña a importancia de educar no uso responsable das tecnoloxías, ensinando que controlar o móbil doutra persoa non é querer máis e que todas as persoas teñen dereito a relacionarse sen presións nin ameazas.
