O pleno municipal do Rosal aprobou, coa abstención do PP, unha moción para solicitar á Xunta de Galicia que rectifique a decisión de excluír os campamentos municipais do programa Bono Concilia Familias 2026. O goberno local considera inxusta a medida, anunciada en pleno agosto cando os campamentos xa estaban en marcha e moitas familias xa tramitaban a solicitude de axuda.
A alcaldesa, Ánxela Fernández Callís, cualificou a modificación como "un atropelo ás familias que confiaron nun sistema de axudas que ata ese momento tamén cubría os campamentos municipais". Engadiu que "non é xusto nin ético cambiar as regras do xogo na metade do partido, moito menos nunha cuestión tan importante como a conciliación familiar".
A corporación municipal esixe que o acceso ás axudas, que agora só financian servizos de empresas privadas e se reparten por orde de solicitude, se realice mediante concorrencia competitiva con baremos obxectivos que prioricen ás persoas con maiores necesidades. A rexedora subliñou que "non ten sentido que no Concello fagamos un esforzo por establecer criterios sociais nos nosos campamentos municipais e garantir que as prazas cheguen ás familias con maiores necesidades e que, despois, as axudas autonómicas se concedan en función de quen consegue presentar antes unha solicitude".
A moción aprobada reclama á Xunta que estableza políticas de conciliación baseadas na igualdade, a equidade e a universalidade, que publique os orzamentos e bases con antelación, incremente a partida destinada ao Bono Concilia e reforce as axudas aos concellos para financiar servizos municipais de conciliación durante todo o ano.
Ademais, o goberno municipal mostrou en pleno o seu rexeitamento unánime aos actos vandálicos sufridos polo mural realizado no Rosal polo colectivo Baixo Miño con Palestina. O mural, creado en novembro de 2025, sufriu un primeiro ataque con pintura o 4 de decembro dese ano e o pasado 6 de agosto de 2026 foi vítima dun novo acto vandálico con pintadas sobre a mensaxe ‘Palestina libre’.
Ánxela Fernández Callís salientou que estas accións "atentan contra un dos dereitos democráticos fundamentais como é a liberdade de expresión", destruíndo "dun xeito basto e groseiro unha peza cultural".
