O son das gaitas, o traballo dos cabaqueiros, os sabores da terra e unha Praza do Calvario ateigada de xente marcaron o éxito das Festas do Outono do Pilar en O Rosal. Durante dous días, centos de persoas participaron nunha programación que combinou música, gastronomía, tradicións e cultura popular, destacando a identidade rosaleira e o patrimonio local.
A alcaldesa, Ánxela Fernández Callís, destacou a "enorme resposta da veciñanza" e sinalou que estas festas son "unha oportunidade para reencontrarnos, as nosas tradicións e recoñecer o traballo de tantas persoas e colectivos que contribúen a conservar e transmitir a nosa cultura".
A música abriu as festas o domingo 11 con concertos de La orquestina de la abuela Pina e Tiruleque. O luns continuou cunha intensa xornada na Praza do Calvario, que acolleu a V Feira de Produtos do Rosal, onde produtoras e produtores locais expuxeron, ofreceron degustacións e venderon produtos de proximidade. A oferta gastronómica completouse con polbo e xamón, amenizada pola música de Castro y los Escoltas.
O VI Memorial Irmáns Flores, organizado pola Asociación de Gaiteiros da Xistra, reuniu grupos como Os Terribles de Donas (Gondomar), Alxibeira (Narón) e Faíscas da Pontagra (Tordoia), mantendo vivo o recordo das antigas murgas rosaleiras.
A demostración do traballo dos cabaqueiros, que amosaron o proceso tradicional de elaboración de tellas, foi outro dos momentos representativos, transmitindo un oficio ligado á historia do Rosal. A rapazada tamén participou coa actividade de Barafunda, ‘O gran cabaqueiro de globos’. A programación incluíu tamén intervencións da banda da Agrupación Musical do Rosal (AMdOR), da Coral Ecos do Folón e unha exposición de pintura e cestería das alumnas de Águeda Suárez.
