A revisión do Proxecto de Explotación da concesión XG859, que afecta a municipios como O Rosal, A Guarda, Tomiño e Tui, revelou carencias significativas. Entre os problemas detectados, o goberno local sinala tempos de espera excesivos para chegar aos hospitais Álvaro Cunqueiro e Meixoeiro, que poden superar as dúas horas ao pasar pola Estación Intermodal de Vigo.
As propostas municipais buscan mellorar a conexión coa área sanitaria e con Vigo, solicitando que as liñas regulares e semidirectas atravesen os núcleos máis poboados, como O Calvario. Así mesmo, esíxese unha adaptación dos horarios das liñas que conectan co campus universitario de Vigo e reforzos nas conexións de fin de semana para facilitar o desprazamento do alumnado e a actividade comercial.
Outro dos eixos fundamentais das alegacións céntrase na poboación estudantil que acode ao IES A Sangriña, na Guarda. O Concello demanda dimensionar as rutas para incluír As Eiras e axustar os horarios ao calendario lectivo. Ademais, reclámase a incorporación da parada de San Xián na liña 13 para garantir a cobertura total da costa rosaleira.
