A Xunta iniciou no Porto do Son o seu proxecto piloto de praias inclusivas, que implica a instalación de estruturas climáticas sostibles nos areais. O obxectivo é que estas sirvan de refuxio para persoas con problemas de mobilidade durante episodios de altas temperaturas.
A conselleira de Medio Ambiente e Cambio Climático, Ángeles Vázquez, visitou esta mañá o refuxio inclusivo instalado na praia do Cruceiro. Esta iniciativa, que tamén se porá en marcha en Baiona e Viveiro este verán, conta cun orzamento de 85.000 euros.
Segundo explicou a conselleira, o proxecto busca avanzar na creación de espazos litorais "máis accesibles, inclusivos e adaptados á necesidades de toda a cidadanía", facilitando un uso máis seguro e cómodo da praia para persoas con mobilidade reducida.
Estes refuxios inclusivos están deseñados para ofrecer unha zona de sombra, accesos sen barreiras arquitectónicas, espazos amplos para a mobilidade de persoas usuarias de cadeiras de rodas, e sinalización táctil e visual adaptada, ademais de zonas de descanso e elementos de orientación e seguridade.
Ángeles Vázquez tamén destacou que estas estruturas intégranse respectuosamente na paisaxe costeira, respondendo ao compromiso do Goberno galego co desenvolvemento sostible do litoral. Incidiu en que estas iniciativas contribúen a distintivos de calidade ambiental e de servizos como a Bandeira Azul e a Bandeira Verde.
