A deputada de Emprego da Deputación da Coruña, Rosa Ana García, xunto ao alcalde de Noia, Francisco Pérez, visitou hoxe distintos establecementos adheridos á campaña MercaNaVila. O percorrido permitiu comprobar o impulso que a iniciativa está a dar ás vendas do comercio local e a súa repercusión no municipio, que se sitúa entre os que rexistran un maior volume de compras con estes bonos, xunto con Ordes e Cee.
A visita incluíu os comercios locais O Merliño, Rasgos, Model Line e Opticalia, onde a deputada e o alcalde conversaron cos responsables sobre o desenvolvemento do programa e a utilización dos descontos.
MercaNaVila, na súa segunda edición, conta con 1.136 establecementos adheridos en localidades de menos de 20.000 habitantes da provincia. Ata o momento, a campaña mobilizou máis de 9,7 millóns de euros en vendas, e os consumidores utilizaron xa 4,3 millóns de euros en descontos, o que representa o 86 % dos 5 millóns de crédito habilitados pola Deputación.
Rosa Ana García destacou estes resultados como mostra da boa acollida do programa entre o comercio e a cidadanía, salientando a posición destacada de Noia na actividade comercial vinculada á campaña.
Os bonos desconto de ata 100 euros poden descargarse na páxina web www.mercanavila.gal e utilizarse ata o 20 de novembro ou ata o esgotamento do crédito dispoñible. Os descontos aplícanse directamente no momento da compra: 10 euros para importes de entre 20 e menos de 30 euros; 20 euros para compras de entre 30 e menos de 50 euros; e 30 euros para compras iguais ou superiores a 50 euros.
