As intervencións centráronse na modernización das instalacións, incluíndo a posta en marcha dun novo sistema de climatización para garantir o confort térmico durante todo o ano. Tamén se dotou de novo mobiliario de almacenamento, optimizando a organización dos espazos, e reforzouse a seguridade coa instalación dunha cancela na entrada principal. Ademais, realizouse o pintado exterior do edificio, contribuíndo á súa conservación e á mellora da imaxe.
Recentemente, o alcalde, Luis Oujo, acompañado por membros do goberno local, recibiu á conselleira de Política Social, Fabiola García, para coñecer de primeira man os resultados destas actuacións. Durante a visita, o rexedor agradeceu a colaboración da Xunta de Galicia e subliñou a importancia de seguir investindo en servizos para a primeira infancia e en manter os centros educativos en óptimas condicións.
Estas melloras enmárcanse na estratexia do Concello de Porto do Son para a modernización das infraestruturas educativas e a prestación dun servizo de calidade ás familias do municipio.
