O xerente do Consorcio Galego de Servizos de Igualdade e Benestar, Perfecto Rodríguez, visitou o centro de día para persoas maiores de Outes, onde anunciou a sinatura dun convenio de colaboración para realizar obras de mellora neste verán. Acompañouno o alcalde do concello, Francisco Calo.
O Consorcio achegará 48.000 euros para o pintado interior, a instalación de novos pavimentos, a renovación de proteccións na escaleira e un novo revestimento na fachada. O Concello xestionará a contratación e o seguimento destes traballos, que se suman a melloras realizadas o ano pasado por importe de 20.000 euros.
Pola súa banda, o centro de día de Muros xa conta cunha nova instalación de climatización, instalada a semana pasada. O ente autonómico destinou máis de 48.000 euros a mellorar o sistema nas salas polivalentes, comedor e cociña, cofinanciado con fondos europeos.
Esta actuación busca aumentar a comodidade do persoal e dos usuarios, especialmente durante os meses de maior calor. Forma parte dun plan de melloras dos centros de maiores do Consorcio cun investimento total de 1,7 millóns de euros.
