A Asociación de Persoas con Discapacidade da Bisbarra de Muros (Adisbismur) reforza os servizos que presta ás persoas con discapacidade no seu centro de atención diurna en Valadares, concello de Outes. Esta mellora foi posible grazas á financiación da Xunta de Galicia, a través da asignación tributaria do 0,7% do IRPF, coñecida como X Solidaria.
Os fondos permitiron renovar e ampliar o equipamento do servizo de fisioterapia para unha intervención terapéutica máis eficaz. Na aula de informática, incorporáronse recursos tecnolóxicos para favorecer a comunicación e a adquisición de competencias dixitais. A aula de pedagoxía dispón de novo material para actividades de estimulación cognitiva e aprendizaxe adaptadas.
Tamén se impulsaron os talleres ocupacionais de viverismo e cestería. No primeiro, renovouse maquinaria especializada para mellorar os traballos de cultivo e diversificar a produción. No segundo, a incorporación de maquinaria profesional ampliará as posibilidades de creación e atenderá novos encargos.
Estas melloras repercuten directamente na calidade da atención, promovendo a autonomía persoal, a inclusión social e a participación activa dos 52 usuarios que acoden ao centro dende os municipios de Muros, Outes, Carnota, Noia, Negreira, Mazaricos, Santa Comba e Lousame.
O centro conta cun equipo multidisciplinar de profesionais de fisioterapia, terapia ocupacional, psicoloxía, logopedia, pedagoxía, educación social, monitores especializados e persoal de atención directa.
