A parlamentaria nacionalista cualificou a situación actual da área mineira como "unha ameaza permanente para a seguridade das persoas, os ecosistemas fluviais e a pesca e o marisqueo da ría de Muros e Noia", lembrando que a Xunta acordou a caducidade das concesións no ano 2025.
Pérez denunciou que "non se teñen cumprido as obrigas legais por parte da concesionaria, moi especialmente a referida á restauración ambiental", sinalando a acumulación de "inmensos pasivos ambientais". Entre eles, mencionou escombreiras, galerías abandonadas, verteduras continuadas de augas contaminadas e dúas presas de residuos mineiros "en estado de abandono e cun risco ambiental acreditado" por informes oficiais de 2017.
A deputada repasou a "nefasta xestión histórica" da mina, con máis de vinte concesións vixentes ata 2066 pero cun longo período de inactividade entre 1990 e 2009. Criticou que a Xunta aprobara en decembro de 2009 os proxectos de explotación e restauración sen que a empresa presentase o preceptivo estudo de impacto ambiental.
Tamén se referiu á autorización de verteduras outorgada en 2023 á empresa Tungsten San Finx, que foi revogada tras comprobar Augas de Galicia verteduras non autorizadas con altas concentracións de cadmio, cobre e zinc, o que resultou nunha sanción de 180.000 euros e unha sentenza xudicial que confirmaba a denuncia de Ecoloxistas en Acción.
“"Non pode haber unha nova concesión se antes non se garante que todas estas irregularidades non volvan producirse"
Pérez pide á Xunta que aclare quen asume os custos da restauración ambiental, cal é o estado das balsas de lodos e como se van estabilizar ou eliminar, que influencia teñen as verteduras na calidade das augas da ría de Muros e Noia, e se se fixo algún estudo de riscos ambientais, sociais e económicos para a ría e para o marisqueo antes de sacar a concurso a explotación.
