A campaña Punto Rojo trae a Baio unha fin de semana repleta de actividades comerciais e de ocio. Dende o venres 21 ata o domingo 23 de agosto, os establecementos adheridos ofrecerán descontos de entre o 20% e o 50%. As tendas abrirán en horario ininterrompido de 10.00 a 21.00 horas, e ademais haberá postos nas rúas con saldos e produtos de segunda man.
A oferta comercial complétase con diversas actividades culturais e de lecer. O venres 21, ás 22.00 horas, proxectarase a película Sirat na Praza Jorge Mira. O sábado 22, a agrupación da AC Adro actuará ao mediodía, mentres que pola tarde a Charanga O Rumbo animará as rúas. O domingo 23, a música correrá a cargo da Charanga Os Celtas ao mediodía e de Santa Compaña pola tarde.
Para coñecer mellor a localidade, haberá un tren turístico operativo o sábado e o domingo en horario de mañá e tarde. Ademais, a Praza Jorge Mira acollerá diferentes actividades infantís para os máis pequenos.
A experiencia gastronómica inclúe unha Ruta de Tapas por seis locais hostaleiros de Baio, cun prezo de 2,5 euros por tapa (agás en A Lareira). Os comensais poderán participar no sorteo de 1.600 euros en premios. Os locais participantes ofrecerán especialidades como ensaladilla de polbo, raxo con cachelos, salpicón Costa da Morte, empanada caseira, xamón asado, perrito 'Mané', tacos de salmón e carne, longueirón e pratos de pluma de porco Duroc.
