A alcaldesa de Muros, María Lago, manifestou que a sentenza do TSXG, que condena ao concello por expor a unha traballadora de Servizos Sociais a un "risco grave", débese á carencia dunha avaliación de riscos psicosociais. Este documento, segundo a rexedora, debería estar integrado no Plan de Prevención de Riscos Laborais.
“"Temos que asumir e asumimos o erro de non ter revisado o Plan de Prevención de Riscos Laborais do concello nada máis entrar no goberno, no verán de 2023."
A rexedora indicou que, unha vez detectada esta deficiencia, o goberno local comezou a traballar na elaboración dunha avaliación específica e completa para cada área, coa participación do persoal municipal. Subliñou que será a primeira vez que o Concello de Muros conte con tal ferramenta, a pesar de que a Inspección de Traballo leva insistindo neste tema desde o ano 2010 en todas as administracións.
Pola súa banda, a voceira do PP de Muros, Inés Monteagudo, esixiu ao goberno local que acate "de forma inmediata" a sentenza do TSXG. A representante popular afirmou que o fallo xudicial acredita que o concelleiro de Servizos Sociais enviou á traballadora demandante a unha situación de "risco grave" ao facela entrar na casa dun toxicómano sen as medidas de prevención necesarias.
“"Estamos a falar dunha conduta moi grave."
A voceira do PP tamén sinalou que a sentenza recolle a falta de cumprimento das medidas a posteriori, xa que foi a propia Inspección de Traballo a que instou ao concello a realizar un plan de prevención de riscos psicosociais. Ante esta situación, o PP esixe a dimisión do concelleiro de Servizos Sociais e, de non producirse, pide á Alcaldía que lle retire todas as competencias.
