A Mancomunidade de Augas Muros-Carnota fai un chamamento á responsabilidade e á colaboración de toda a veciñanza, visitantes, actividades económicas e usuarios da rede, solicitando que se extreme o aforro e se eviten todos aqueles consumos que non sexan estritamente necesarios, ante a situación de escaseza moderada de auga activada pola Xunta de Galicia.
Desde a publicación deste bando e ata novo aviso, quedan prohibidos os seguintes usos da auga potable da rede: o rego de xardíns, hortas, céspedes, plantacións e demais zonas verdes; o enchido ou reposición de auga en piscinas; o lavado de vehículos fóra dos establecementos autorizados; a limpeza de beirarrúas, rúas, patios, fachadas e outros espazos exteriores; e calquera outro uso non esencial que implique un consumo elevado.
Como medida adicional, a Mancomunidade procederá á suspensión temporal ou peche dos puntos de subministración de auga de uso público, incluíndo duchas en praias, áreas recreativas, fontes, puntos de auga potable de uso non esencial, e bocas de abastecemento para autocaravanas.
Recoméndase á poboación reducir ao mínimo o consumo, evitar deixar correr a auga innecesariamente, revisar e reparar fugas nas instalacións particulares, e utilizar electrodomésticos con carga completa, priorizando sempre os usos básicos e imprescindibles.
A Mancomunidade realizará un seguimento da evolución do consumo e da dispoñibilidade de auga. No caso de que non se produza unha redución suficiente ou se agrave a situación, poderanse adoptar novas medidas restritivas, incluíndo limitacións ou cortes temporais na subministración para garantir as necesidades básicas.
