O municipio lucense de Pol celebra hoxe, 24 de agosto, a súa tradicional XLI Festa do Emigrante. O evento ten lugar na Carballeira de Mosteiro e busca ser un punto de encontro e homenaxe para a diáspora do concello, reunindo a centos de veciños, visitantes e familias retornadas nunha xornada dedicada á convivencia.
A xornada comezou ás 13:00 horas cunha misa solemne, seguida da lectura do pregón a cargo de Manuel Abraira Fernández, veciño de Pol emigrado a México nos anos noventa. Tras o descubrimento da placa conmemorativa e a sesión vermú co grupo Stereo, celebrouse unha comida popular.
A programación da tarde inclúe actividades infantís a partir das 16:30 horas, a animación da charanga Louband e unha verbena nocturna coas actuacións de Stereo e a orquestra Triunfo. O alcalde, Lino Rodríguez Ónega, destacou a instalación de grandes carpas para albergar a case 1.400 persoas, asegurando que "o Concello colocou grandes carpas onde situamos a case 1.400 persoas para que ninguén quede sen festa".
Rodríguez Ónega subliñou a evolución da festa, sinalando que actualmente son os fillos e netos dos emigrantes os que manteñen os vínculos e regresan cada verán. "Sempre é un orgullo que todo o mundo retorne á nosa terra, porque eles dan vida aos nosos pobos", afirmou, destacando o dinamismo que achegan ao comercio e aos servizos locais.
Ademais do ambiente festivo, o alcalde tamén reflexionou sobre a perda de poboación no municipio e a necesidade de políticas contra o despoboamento. Reclamou maior implicación das administracións en materia residencial, xa que o Concello carece de vivendas e ten dificultades para obter axudas a pesar de dispoñer de máis de 7.000 metros cadrados edificables.
