O delegado territorial da Xunta en Lugo, Alfonso Villares, participou na presentación do encontro deportivo, que conta co respaldo da Administración autonómica un ano máis. No acto tamén estiveron presentes os organizadores Óscar Fernández, Manuel Huerta e Miguel Rodríguez, xunto á xerente de NaturLeite, Chus Peteira.
O torneo, que se organiza en seis categorías por tramos de idade (desde premini ata senior), con equipos de tres a catro xogadores, suma este ano máis de 60 inscricións. Delas, 21 corresponden á categoría senior, mentres que as restantes se distribúen nas categorías de base, sumando un total de arredor de 240 xogadores.
Villares destacou a consolidación do torneo, que se celebra no marco das festas patronais de Meira, como unha das propostas deportivas máis relevantes do municipio. Tamén salientou o poder de convocatoria e a implicación de persoas e entidades, como o CB Vila de Meira, para manter unha celebración que dinamiza socialmente a localidade e promove a práctica deportiva, especialmente entre a mocidade.
