A competición contará coa presenza de figuras internacionais como o atleta galego Adrián Ben e a francesa Alice Finot, ademais de probas para diferentes categorías e idades.
A xornada do sábado 31 de outubro comezará ás 17:00 horas coa competición de relevos mixtos nas categorías sub16, sub14, sub12 e sub10. O domingo 1 de novembro concentrará o groso das probas, iniciándose ás 10:00 horas coas carreiras de menores e ás 12:00 horas coas dos máis pequenos. Tamén se disputará o Cross Popular Jesús Bernal (4.320 metros) ás 12:05 horas, seguido da carreira feminina (5.000 metros) ás 12:30 horas e a masculina (5.000 metros) ás 13:00 horas.
O Cross Ponte Romana consolídase como unha cita deportiva que combina a presenza de atletas recoñecidos coa promoción do deporte de base e a participación de corredores de diferentes idades, co patrocinio do Concello de Lugo.
Con motivo da celebración do evento, haberá cortes de tráfico nos accesos ao Paseo Fluvial e ao Pazo de Feiras e Congresos. O sábado 31 de outubro, os cortes comezarán ás 16:00 horas, e o domingo 1 de novembro, a partir das 9:00 horas. Afectarán á avenida dos Deportes e ao acceso ao Paseo Fluvial desde a rúa de Santiago. Tamén estará prohibido estacionar neste último punto durante ambas as xornadas. Os horarios son aproximados e poderán ser modificados pola Policía Local.
