A Consellería de Vivenda e Planificación de Infraestruturas, a través do Instituto Galego da Vivenda e Solo (IGVS), formalizou a adxudicación do contrato á empresa Desarrolla Obras y Servicios, S.L. para a restauración deste emblemático inmoble. O prazo de execución previsto para os traballos é de 20 meses.
O proxecto céntrase na rehabilitación de ambas as edificacións que compoñen o complexo: a Casa Torre, de planta cadrada e orixe medieval, e unha edificación anexa polo noroeste. O inmoble está situado xunto á Muralla Romana de Lugo, no corazón da cidade histórica.
Ademais da restauración estrutural, o proxecto contempla a mellora da accesibilidade á Muralla. Para iso, instalarase un ascensor interior que conectará a cota da cidade co nivel do adarve da muralla, facilitando o acceso a este elemento patrimonial.
